06年既年假终于响07年派上用场啦~经过近一个月既准备，响5月底6月初呢个旅游淡季，我同阿凤两个人飞到左向往已久既彩云之南——丽江。以下为7日流水帐，无兴趣者可直接跳过去睇相。
        D1：抵达丽江机场已经系下午既3点几啦，响机场拿左行李，马上搭机场大巴赶赴丽江。正系系车上，我地遇到左一对同样来自广州既情侣，阿英同埋阿东。大家一路上有倾有讲，发现行程又有D相似，大家又都未定住既地方，决定一齐去稳客栈住，由此开始左前面几日既共同旅程。去到蓝天宾馆落车，同前黎接头既阿婷会面。好多谢阿婷呢个地胆，不辞劳苦甘带住我地入古城，稳客栈。丽江地处高原上既盆地，太阳既猛且毒，由于人生地不熟，我地响古城沿山一带拿住行李乱行一通，但就系稳5到BOBO强烈推荐果间云茶居客栈。于是，我拿出之前打印既地图，一齐去左老谢车马店。老谢车马店系一个仿纳西院落，临近东大街，院内种满各种花草，属于旺中取静，除一般基本住宿设施外，仲有自助洗衣，免费电脑上网，DVD任睇等各种设施。最犀利既系老谢本身就系一个自助游专家，有咩唔明都可以去滚搞距，去丽江之前我都加左MSN经常骚扰距噶。住落稍事休息之后，阿婷就带我地出去新城既七星街上食腊排骨。果间野叫永胜，48文一个中锅，再加D青菜，食到我地个个都捧住个肚，又平又正，一餐落黎先70几文，抵啊！之后各自逛古城，阿英发短信叫我地去樱花屋酒吧度玩，但我地行黎行去就系稳5到，算，随缘啦~ 之后竟然响街度撞到喔，原来距地已经玩完返黎啦，丽江真系细，跟住就一齐返老谢度啦。
         D2：原先想睡到自然醒既，点知我地间房有个窗系临街既，一早D学生返学比较吵，后尾竟然有人响外面踢波喔，嬲到我吖，决定搬！于是一早开着部电脑，稳到云茶居个电话，打个去就叫老板娘带路，睇左吓环境，觉得OK，就先同老谢退左房，然后去食早餐。早餐系东大街上既云南“正宗蒙自过桥米线”，老实讲，味道一般。。。仲叫左碟抄饵块同埋血肠，饵块即系面粉切块，血肠就系将血灌落糯米肠度之后再切片煎，噢。。。It's not my cup of tea...席间一直不停有人问需要包车吗，货比几家后，我地决定搭一个束河人既车去玉龙雪山，讲好5骑马，直接去大索道，之后距会送我地到束河古镇，省埋每人30文既门票，车费为80文。司机系个老实人，一直搭我地去到玉龙雪山，仲拿埋驾驶证帮我地做租羽绒既抵押添。
         之后搭大索道上山，不愧系全国最高既索道，从3365米上到4506米既海拔，显然就系为左等一般既人只要驶左钱就可以到达发梦都到5到既地方。去到索道入口发现游人超多，虽然系淡季，都排左成个钟既队，听同事讲，黄金周果时要排4个钟啊~由于初初觉得自己年轻力壮，大家就无买氧气上山，点知刚落索道一程，阿东就话5想行啦，要抖吓，我地3人就惟有继续冲锋啦~又行左几步，阿英话5放心，返去陪距，于是，就的返我同阿凤上山啦。。。亲近雪山既感觉相当好，但系时间一长，渐渐觉得有D索气啦，惟有行两步，抖一抖。走响雪山既感觉系难忘既，但与此同时发生既高原反应亦令我地比较辛苦，好彩一路上互相打气，终于上到左栈道既最高点，海拔4680既平台，望住行过既路，感慨万千，快D影返几张合照留念先。。。落山就舒服多啦，但系都系要排队上索道，人多，氧气又稀薄，真系头都晕埋。落左山同阿英地会合，之后先知她响排队落山时几乎晕低，要去急救，吸两淡氧就要收30文，真系@#$%~之后考虑到大家都几累啦，干脆打道回府，直接返丽江，益左个司机添~呵呵。
        夜晚去食琴日阿婷推荐既川菜馆，酸菜鱼，麻婆豆腐==，还可以啦，不过比腊排骨就差点啦~腐败之后就返客栈，客栈2楼个平台有台有凳，可以睇到古城风景，好正架，我地坐响上面吹住凉风倾住计，望住下面古城一片繁华景象，好不惬意，如果再有壶好茶就正晒啦~不过后尾2楼既客人返黎啦，我地都5好意思继续霸住人地个门口，惟有拿拿声返房睡~ 
       D3：由于上雪山既劳累，今日决定响古城度转吓。朝早起身之后同阿英距地各自分开游玩，我地先去左大石桥附近食黄豆面，抵食夹大份，先至一人4文！不过由呢日开始我发现左一件事，就系古城D WAITRESS同埋卖野D阿姨既服务态度都比较恶劣，系米古城太商业化之后，D野都5忧卖呢。。。之后继续闲逛，中午时分，竟然又撞到阿英距地喔~再一次感慨丽江真系细之后，就一齐去左百岁坊既集贤馆度开餐啦。由于过左午饭时候，人亦5多，我地拣张窗边既台坐落，风景开阔，可以睇到小桥流水，同埋三五游人。两个女仔话要去买香蕉奶昔，点菜就交比我同阿东啦，最后点左纳西烤鱼、抄树皮、同鸡棕菌，都系纳西风味菜，过左无耐伙计黎同我地讲，话D鸡棕可能有D变变地，叫我地换个个（呢仲服务态度抵赞~），于是就又点左份杜鹃花抄蛋，等距地返到黎大家一轮冲锋，将D野消灭干净，就系味道都比较重左D，其他还好。
         茶足饭饱，一行人又到左木府，不过阿英地想去菜市场，我同阿凤打算响木府外面兜个圈，之后上万古楼，所以又暂时分手咯~兜兜转转，经过三眼井，三眼井系丽江当地特色，上池饮用，中塘洗菜，下池洗衫，系纳西族人合理利用水资源的典范！去万古楼既途中经过一间店仔，神神秘秘，话系各地艺术家聚会既地方，又话夜晚会有便衣把守，要讲系主人朋友先可以去，仲叫我地夜晚去玩。哇，我地得两个人，都系等下次人多D先去一探究竟啦~上万古楼既途中乌云密布，雷声轰轰，马上抬起相机一轮急跑，上到去先发现净系行雷，无落雨。万古楼地处狮子山顶，丽江市区一览无遗，北面系玉龙雪山，西面系古城，南面一片广阔平原，可以远眺拉市海，东面系新城区，果然可以睇尽丽江万古，然之后，之后，我地竟然见到彩虹喔~应该系周边地区落左雨啦，废话少讲，马上影返几张先~晚黑阿凤觉得5想食重口味既野，就去左阿酷咖啡度林住食西餐，点左份牛扒，一份沙律，仲有个菌汤。点果时已经奇怪啦，点解5问我要几成熟呢，一上黎，晕低~竟然系10成熟，仲要系牛肉碎。。。问个小妹，距竟然讲大家都系甘食。。。随便食几淡之后就埋单松人，去老谢度订去泸沽湖既车票，早早返到客栈。今日BOBO地一班人返到黎啦，距地早我地一日到丽江，去左香格里拉同梅里雪山，仲响飞来寺睇到日照金山添~羡慕死人啦！跟住几日距地会去玉龙、束河同埋拉市海、黑龙潭，泸沽湖就等我地先去探路啦~哈哈。
         D4：今日开始，我地走上左同阿英距地5同既路线，对于BOBO黎讲，我地系先锋，呵呵~上左车，发现成车都系讲“煲冬瓜”既，汗。。。终于，响最后一排空位旁边，终于听到左乡音！倾落先知，距地都系广州黎既，应该系两公婆，过黎休婚假。丽江到泸沽湖车程要成7个钟，包括埋中间食饭既时间，个司机十足导游，一路上介绍吓拍千里走单骑既山路十八弯啦，金沙江上既大桥啦，仲话咩彝族人好野蛮啊，经常响路度放D鸡啊牛啊，撞到要你赔几千之类，又吹水话带我地去味道最好既店度食饭，仲话当地特产系土鸡蛋同埋土豆云云，不过中午果间就绝对系黑店，算~当扶贫啦。
        一翻颠簸之后，终于黎到左泸沽湖！司机先带我地去哑口观景台，呢度可以睇到泸沽湖全景，果然美不胜收呢~蓝蓝的天，白白的云，绿绿的草，同样蓝蓝的湖水，绿绿的小山。。。原谅我吧，简直就是人间仙镜！谋杀完储存卡之后，司机就带我地去近距离亲近泸沽湖啦——泛舟，猪槽船，去湖心岛。泸沽湖D水好清，一眼可以望到湖底，岸边仲生住D叫“水性扬花”的小花，根响水底，花响水面，好得意；湖心岛上都无咩睇，就得座庙同埋所谓既洛克故居，反而湖边D景色都仲5错。。。撑船个哥仔比较懒散，竟然比其他船慢左几拍，来回用左快3个钟，之前晕开车既估计要接住晕船啦，我地都5知系赚左定蚀左。。。响湖上泛舟，又同蔡生蔡太有左初步既认识，就系之前车度识得果对夫妇啦~上岸之后烤鱼都5食啦，马不停蹄继续上路，赶去里格。
        里格村同落水村系泸沽湖畔知名度稍高既村落，落水开发得比较完善，可以欣赏摩梭风情；里格则由于风景优美而备受自助游者青睐。到达里格村，入住里格国际青年旅馆，即系又系老谢地头，响观景房的阳台上望住湖边既杨柳同埋猪槽船出神，令人忘记身在何处。。。草草食过饭后，就沿湖边到里格半岛去游玩，天黑啦，因为觉得篝火晚会无咩睇头，就返左旅店既餐吧度坐吓。响果度，睇住泸沽湖既地图，不由自主甘就对泸沽湖产生出兴趣黎啦，捉住小妹问长问短，但距都5系好清楚，呢个时候，出现左一把好听既声音，“看日出的话可以到山背后的那个观景台。。。”一个身材高挑既长发女士出现响我地既面前，一身健康既肤色，着住件橙色既背心，拿住部IPOD，好专业甘向我地介绍起黎。企住不如坐低，大家坐低要左杯咖啡，跟住就开始鸡DANG唔断啦~原来距叫阿Ann，系上海人，因为中意旅游，成日做做吓辞职周围去，之前距响丽江做左一年野，今次距妈黎旅游随便探距，就一齐黎左泸沽湖啦。阿Ann仲拿出随身带既相机比我地睇距去过既地方，有云南、四川、新疆、西藏，曼谷、布吉。。。仲同我地分享香格里拉既行程安排添。一路睇落黎，反而觉得我地呢次行程乏善可陈呢。。。相约第2日一齐上观景台睇日出之后就各自返去休息啦，一夜无事。
        D5:一早六点钟爬起身，拿起脚架同相机就向琴晚阿Ann介绍果座山仔进发，上到去先发现东边仲有座山挡住，不过见到搭猪槽船去骆驼岛睇日出既船已经出发啦，算，净影里格半岛既景色啦。跟住个健身阿叔一直上，即去到一个观景台啦，果然如阿Ann所讲，系拍摄里格半岛既绝佳位置，不过，见5到阿Ann。响果度，其实就系盘山公路既路边，我地竟然又撞到车我地黎泸沽湖既司机喔，距之前话可以带我地上女神山睇日出，不过山上既索道要价98文，我地就5去啦，车上有4、5个应该都系学生吧，5知上面d风景系米真系甘靓呢。。。同健身阿叔倾起计，先知道原来距地一大班亲戚黎住两晚喔，仲去左个叫草海既湿地好靓架，话最适合影相，可惜我地等阵就要返去啦，之前功课做得5足，惟有留翻下次啦。影完相落返山，响餐吧度食左个营养早餐之后，就返房大觉训咯~皆因10点先返丽江，仲可以摊抖吓。 可能系因为个司机赶住返丽江既关系,一路上噔到吖~好不容易又涯到琴日食饭间黑店,今次就醒目啦,随便点两份青菜白饭充充饥,返去再算。食食吓，一个橙色既人影行左入黎，原来系阿Ann喔~距地又响呢间黑店度食饭。讲起睇日出既事，原来距地司机又车左距地去5知边度，所以无撞到，不过世界真系细啦，5知返左丽江会5会再遇呢，之后一路上继续颠簸。。。
       返到丽江，吸取之前既经验教训，今晚我同阿凤去吃清真牛肉，系一间隔叫古城牛肉面既铺头。要做份清汤牛肉同埋份抄野菜，仲见到有牛肉小笼包添，怕浪费，小笼包就留返下次做早餐啦。牛肉焖得好嫩，野菜都几清甜，OK~食食吓有短信，原来阿蔡生约我地一齐去虎跳峡哦，一场黎到，我点会放过呢，只系睇5到阿凤微变既面色，（OH！我犯左个大错啊！）4个人一齐去了解左吓行情，决定包部6座面包去玩，午餐自理，然后就分头行动啦。买左部分手信之后，我地决定去买面包同八宝粥做午餐，响店度又撞到距地喔~真系桥，丽江果然细。 返到客栈，阿英话距地听朝就返广州啦，所以今晚大家买左好多野食，一齐倾计，仲有楼上住既一对夫妇（听讲个男既系北京既国宴厨师黎噶~），响我地去泸沽湖果阵距地又一齐去左束河古镇同去拉市海骑马，之后仲交换D相黎睇添，景色都几靓，可能系晒得滞，阿东条颈同双手都红晒，惟有搏命甘搽防晒啦~食到甘上下，BOBO地都返埋黎，成间客栈鬼甘热闹，距地听日就去泸沽湖啦，有左我地既经验，希望距地玩得开心啦~呢一晚，阿凤哩响间房度无出黎。。。
       D6：今日系我地游玩丽江既最后一段行程啦，都系早起，简单啃两个面包后出发。一路上，阿凤都无点讲野，追问之下先知距5舒服，（哎，我真系大懵，一早就应该觉察到，无好好照顾距5单止，仲为左我既贪玩而出左黎。。。）车先到左长江第一湾，去到先发现只能够响岸边睇，如果想影相就要上山，可能两位女士都比较劳累，就决定走人。就系呢个时间，突然间隔离摆滩个阿婆话距自己开左条上山既路，可以10分钟就去到影到第一湾全景既地方，不过要比距每人5文。一下子，我地又改变主意啦，一翻讨价还价之后，3个人一共5文成交，阿凤响车度休息，我同蔡生蔡太上山。从阿婆指既厕所旁小路上山，我就开始觉得5对路啦，距指吓条路就可以收钱啦，甘米好好稳。。。山路比较崎岖，蔡生蔡太爬得比较慢，我就先上去探吓路先啦。顶！又话10分钟，我越爬越高，但就越来越觉得5可能影到全景，皆因就算去到山顶，角度都可能5够，为左证实一下，我尽量向山上走，直到杂草丛生，无晒路，成座山好好似得返我一个甘，因为担心安全，惟有随手咔嚓几张，再小心甘原路返回。落落吓就听到蔡生“山度有无人啊~”既叫声，原来距地担心我有咩事，一行3人落返山。阿凤响车度睇紧司机D书，无咩事，甘先放心返。好无奈甘比左个阿婆5文后，我地继续去虎跳。
        虎跳原来系因徒步而出名，对于我地呢D5徒步既人黎讲，真系无咩吸引力。只系一条峡边既栈道通向果旧“闻名”既虎跳石，一路上风景一般，去到亦都系影两张相到此一游而已，响金沙江边感受一下江水既澎湃气势之后，，我地就踏上归程啦。司机话带埋我地游拉市海，考虑到阿凤身体5舒服，直接就返到丽江。相比较而言，今日既行程显得5系好值。。。返到客栈休息，我就出去买D水果同埋药啦，期间当然不忘咔嚓几张。晚黑稳D清谈D既野食，就去左间广东风味餐馆，不过D菜都系有小小辣，勉强接受啦。听日就返广州啦，今晚要好好休息。返到去发现收到阿英既短信，话距地返到广州噜~ 
        D7：我循例早起，阿凤仲需要休息，我就一个人出左去清晨既丽江。个人感觉，只有而家既丽江先可以洗去果阵商业气息，先至系真正既丽江。穿过半个古城，去返古城牛肉店买小笼包、丽江粑粑同埋白粥，再返到客栈已经太阳晒屁股啦~食过早餐，收拾好包袱，同老板娘打个招呼后就落古城进行最后既腐败。一路上走过已经几日黎行过N次既路，别有一返滋味呢~从客栈落到四方街，又再行去东大街，出到水车，一路上又买埋剩返既手信，OK~可以准备开饭啦。基于对广州既思念，我地冲左入一间“广州大排挡”，睇住果D熟悉既菜名，好亲切啊。。。
        响飞机度睡左阵，返到广州既第一感觉系，哇！好潮湿啊，简直系两个世界！可能由于习惯左高原既环境，心肺功能都有一定既提高，返到黎觉得宁舍不同，有一种精力充沛既感觉，广州，我地返黎啦！